झा निवासबाट सेना हटे

काठमाडौं, १९ भदौ (दैनिकी)

सर्वोच्चको आदेशअनुसार पदीय दायित्व निष्कृय भएका उपराष्ट्रपति परमानन्द झाको निवासमा रहँदै आएका नेपाली सेना हटेका छन । नेपाली सेनाका कर्णेल पूर्ण थापाको कमान्डमा रहेको ७५ सदस्यीय सुरक्षा दस्ता हटेर शुक्रबार अपरान्हदेखि सशस्त्र प्रहरीले सुरक्षा जिम्मा लिएको छ । कर्णेल थापाले सशस्त्रका प्रहरी निरीक्षकलाई सुरक्षा जिम्मेवारी हस्तान्तरण गरेका थिए । अब उनको निवासमा सशस्त्र प्रहरी निरीक्षक सञ्जयकुमार गोइतको कमान्डमा ३४ जनाले सुरक्षा दिनेछन ।

उनको निवासमा रहेको झन्डा गृह मन्त्रालयका अधिकारीहरु पुगेर साँझ झिकेका थिए । झाको हैसियत संविधानसभाबाट निर्वाचित तर सपथ नलिएको अवस्थामा पुगेका कारण उनलाई सामान्य सुरक्षामा राखिएको गृहका अधिकारीहरुले बताए ।
उनले पाउने तलबभत्ताबारे अहिलेसम्म केही खुलाइएको छैन ।
अन्तरिम संविधान विपरित हिन्दी भाषामा सपथ लिएर विवादमा आएका उपराष्ट्रपति झाले सर्वोच्च अदालतले नेपाली भाषामा सपथ लिन दिएको आदेश नमानेपछि भदौ १४ गते देखि उनको पदीय हैसियत समाप्त भएको छ।