मंगलसेनस्थित सेनाको ब्यारेकमा डिआइजी पार्वती थापा आफूलाई भेट्न आएको थाहा पाएपछि गृहमन्त्रीले भने, 'मैले किन भेट्नु त्यसलाई, भेट्नु पर्दैन रे भनेर पठाइदिनु ।’ तर, आधा घन्टापछाडि उनलाई भेट्न फेरि बोलाइयो । डिआइजी थापाले पनि तपाईंलाई 'गार्ड अफ अनर’ दिने कार्यक्रम छ भनेर गृहमन्त्रीलाई जिल्ला प्रहरी कार्यालय लगिन् । सलामी खान गएका रावललाई उनले बंकरमा लगिन् जहाँ सुन्तली धामीको बलात्कार भएको थियो ।
सुन्तली धामी बलात्कार काण्डको छानबिन गरिरहेकी डिआइजी पार्वती थापालाई गृहमन्त्रीको निर्देशनमा काठमाडौं सारिएको मात्र होइन, कार्यक्षेत्रमै गृहमन्त्रीले अपमानित गरेको थाहा भएको छ । अछाम गएका बेला भेट्न पुगेकी डिआइजी थापालाई गृहमन्त्री रावलले इन्सपेक्टर लगाएर गेटबाटै फर्काइदिएका थिए । दसैंको महानवमीको दिन आफ्नै सहकर्मीबाट अछाम जिल्ला प्रहरीका कार्यालयमा बलात्कृत प्रहरी सुन्तली धामीलाई न्याय दिलाउन र दोषीलाई कारबाही गर्न डिआइजी थापाले पहल सुरु गरेकी थिइन् । उनले घटनाको पूर्ण रिपोर्ट केन्द्रमा पठाउँदै आरोपीलाई हतकडी लगाएर थुनामा राखेकी थिइन् । आफ्नो गृहजिल्लामा भएको बलात्कार काण्डका दोषीलाई कारबाही गराउनुको सट्टा गृहमन्त्री रावल संरक्षण गर्न लागिपरेपछि क्षेत्रीय प्रहरी प्रमुख थापासँग उनको विवाद भएको स्रोतको दाबी छ । यही घटनाका कारण डिआइजी थापाको काज अचानक फिर्ता गरिएको थियो । ४ गते नै फ्याक्स पठाएर काठमाडौं आउन आदेश आए पनि औपचारिकता पूरा गर्न कार्यक्षेत्रमै रहेकी डिआइजी थापा र मन्त्री रावलबीच ८ मंसिरमा अछाममै तनाव भएको हो ।
घटनापछि ८ मंसिरमा मन्त्री रावल अछाम गएका थिए । उनलाई भेट्न डिआइजी थापा मंगलसेनस्थित सेनाको ब्यारेकमै पुगेकी थिइन् ।
थापा आएको खबर सुनेपछि मन्त्री रावलले 'त्यल्लाई किन भेट्ने ? भेट्नु पर्दैन भन्दिनोस्' भनेर सहयोगीलाई अह्राएका थिए । स्रोतका अनुसार ढोकामै उभिएकी डिआइजी थापाले गृहमन्त्रीको आदेश सुनेकी थिइन् ।
मन्त्रीको भनाइ सुनेकी थापा भित्र जाऊँ कि बाहिर जाऊँ भनेर अलमलमा परेकी उनलाई त्यहाँबाट बाहिर जान उनकै 'जुनियर' अधिकारीले 'अह्राएका' थिए । मन्त्री रावलका नाता पर्ने इन्स्पेक्टर कृष्णबहादुर मल्लले डिआइजी थापालाई भित्र पस्न मिल्दैन, तपाइं र्फकनोस् भनेर 'आदेश' दिएका थिए ।
इन्स्पेक्टर मल्लमात्र होइन, प्रमुख जिल्ला अधिकारी ज्ञानप्रसाद ढकाललगायतका सरकारी मान्छेले ढोकामै थापाको बाटो छेकेका थिए । अपमानित थापा सेनाको ब्यारेकबाट फर्केर जिल्ला प्रहरी कार्यालय अछाम पुगेकी थिइन् ।
विभागीय मन्त्री रावल आउने खबर पाएकी थापा उनको सुरक्षाका लागि अघिल्लो दिन नै दिपायलबाट मंगलसेन गएकी थिइन् । रावल १० बजे हेलिकोप्टरबाट मंगलसेन पुग्ने कार्यक्रम थियो । सो क्षेत्रमा वितरण गर्न बिजुलीको तारसमेत लिएर गएका रावल पहिला साँफेमा उत्रने कार्यक्रम भए पनि मौसमले साथ नदिएपछि सीधै मंगलसेन अवतरण गरेका थिए ।
स्रोतका अनुसार जिल्ला प्रहरी कार्यालय पुगेको आधाघन्टामा गृहमन्त्री रावलले डिआइजी थापालाई भेट्न बोलाएका थिए । भेटपछि डिआइजी थापाले गृहमन्त्री रावललाई तपाईंका लागि 'गार्ड अफ अनर' को व्यवस्था छ भनेर जिल्ला प्रहरी कार्यालय लगेकी थिइन् । तर, सलामी थाप्न गएका गृहमन्त्रीलाई डिआइजीले बंकरमा लगेकी थिइन्, जहाँ सुन्तली धामी बलात्कृत भएकी थिइन् । उनले बंकरमा एउटी महिलामाथि उनकै ६ जना सहकर्मीले कसरी बलात्कार गरे भनेर कथा सुनाएकी थिइन् । तर, गृहमन्त्री रावल घटनाप्रति संवेदनशील हुनुको सट्टा मलाई पाठ पढाउने भनेर डिआइजी थापासँग आक्रोशित भएका थिए ।
दोषीलाई बचाउन रावलको निर्देशन मान्न अस्वीकार गरेका कारण पनि मन्त्री रावल थापादेखि रुष्ट रहेको स्रोतको दाबी छ । थापा गत असोज ६ गते काजमा सुदूरपश्चिमाञ्चल क्षेत्रीय प्रहरी कार्यालय खटिएकी थिइन् । एक साता नबित्दै असोज ११ गते जिल्ला प्रहरी कार्यालय अछाममा कार्यरत महिला प्रहरीमाथि सहकर्मीद्वारा सामूहिक बलात्कार भएको थियो । बलात्कार भएकै हो भन्ने प्रतिवेदन बुझाएपछि गृहमन्त्रीलगायतका केही सुरक्षा प्रहरी अधिकारीले थापाले संगठनको इज्जतमा आँच पुर्याएको भन्दै काज फिर्ता गरेका छन् । उनलाई तुरुन्त काठमाडौं फिर्ता हुन फ्याक्समार्फत चिठी पठाइएको थियो । 'तपाइर्ंको काज रद्द गरिएकाले अविलम्ब प्रहरी प्रधान कार्यालय हाजिर हुन आउनू,' उनलाई फ्याक्स गरिएको पत्रमा उल्लेख छ । उनलाई कुनै आरोप लगाइएको छैन ।
राष्ट्रिय मानवअधिकार आयोगले समेत दोषीमाथि हदैसम्मको कारबाही र पीडितलाई क्षतिपूर्तिको व्यवस्था गर्न सरकारलाई सिफारिस गरेको छ । त्यस्तै संविधानसभा महिला सभासद्हरूको टोलीले पनि प्रतिवेदन सार्वजनिक गर्दै अछाम जिल्ला प्रहरी कार्यालयमा जघन्य अपराध भएको ठहर गरेको छ । सेती अञ्चल अस्पताल र अन्य विभिन्न अधिकारवादी संघ/संस्थाहरूले पनि महिला प्रहरी धामी बलात्कृत भएकै रिपोर्ट दिएका छन् ।
धामीले जिल्ला प्रहरी कार्यालयमा कार्यरत ६ जनाले आफूलाई सामूहिक बलात्कार गरेको किटानी जाहेरी दिएकी थिइन् । धामीले सुरुमा जिल्ला प्रहरी कार्यालय अछाममा जाहेरी दिएकी थिइन् । तर, जिल्ला प्रहरी कार्यालयले जाहेरी दर्ता गराउन नमानेपछि सेती अञ्चल प्रहरी कार्यालयमा जाहेरी दर्ता गर्न पुगेकी थिइन् । अञ्चल प्रहरी कार्यालयमा समेत जाहेरी दर्ता नभएपछि पीडित धामी क्षेत्रीय प्रहरी कार्यालय पुगेकी थिइन् ।
बलात्कारका आरोपी असई दानसिंह भण्डारी, हवल्दार विरादत्त बडू र प्रहरी जवान नरिभान महतारा गृहमन्त्रीकै आदेशमा रिहा भइसकेका छन् । स्रोतका अनुसार गृहमन्त्रीका आफन्त पर्ने निरीक्षक कृष्णबहादुर मल्ललगायतले तीनजना प्रहरी रिहा गराएका हुन् ।
अहिले तीनजनाविरुद्ध मुद्दा चलेको छ, र उनीहरूले घटनाको समय आफू ड्युटीमा रहेको बताएका छन् । उनीहरूमध्ये दुईजनाले आफू निर्दोष रहेको भन्दै हवल्दार वीरेन्द्र बम एक्लैले बलात्कार गरेको भन्न थालेको छन् । यही नाटक गरेर थप दुईजनालाई रिहा गराउने षड्यन्त्र भएको स्रोतको दाबी छ । आरोपी पाँचजना बाहिर भएपछि हवल्दार बमको परिवारलाई आर्थिक सहयोग गर्ने वचन दिएका छन् ।
हवल्दार बम पनि आर्थिक सहयोग पाउने सर्तमा आफूले मात्रै गल्ती गरेको मान्न तयार भइसकेको स्रोतको दाबी छ । आरोपी पाँचजनालाई छुटाउन गृहमन्त्रीले सरकारी वकिललाई पनि सहमत गराइसकेको स्रोतले जनाएको छ । मन्त्री रावल र डिआइजी थापाबीच अर्को विषयमा पनि मनमुटाव भएको थाहा भएको छ । ५ मंसिरमा एमाले जिल्ला अधिवेशनअघि अछाम प्रहरीले एक एमाले कार्यकर्तालाई नियन्त्रणमा लिएको थियो । ३ मंसिरमा राति रावलका भिनाजु गोविन्द कुँवरको गाडी मोटरसाइकलसँग ठोक्किएको थियो । यही विषयमा कुँवर र मोटरसाइकल चालकबीच विवाद भएको थियो ।
आफ्ना चालक कुटिएको थाहा पाएपछि रावलका भिनाजु कुँवरले मोटरसाइकल चालकलाई पक्राउ गर्न लगाएका थिए । एमाले सभासद् भानुभक्त जोशीले पनि डिआइजी थापालाई फोन गरी ड्राइभर कुट्नेलाई तत्काल पक्राउ नगरेको भन्दै गुनासो गरेका थिए ।
तर, आरोपी मोटरसाइकल चालकले म एमाले कार्यकर्ता हुँ भन्दा पनि 'तँ झलनाथको मान्छे होलास्' भन्दै समातिएको थियो । मोटरसाइकल चालकलाई थुनिराख्न र तुरुन्त छोड्न भन्दै एमालेका दुई समूह जिल्ला प्रहरी कार्यालय पुगेका थिए । तर, पछि उनी पनि गृहमन्त्री रावलकै पक्षधर भएको पुष्टि भएपछि उनलाई तत्कालै छाड्न आदेश आएको थियो । तुरुन्त छाड्न नमानेका कारण पनि रावल डिआइजी थापासँग रिसाएका थिए ।
काज फिर्ता भएकी डिआइजी थापा अहिले काठमाडौं फर्किएकी छिन् । गृहमन्त्री रावलसँग भएको मनमुटावका बारेमा जानकारी लिन खोज्दा उनी केही पनि बोल्न चाहिनन् ।
No comments:
Post a Comment