एमाले सप्तरी अधिवेशनमा पनि खनालको टेलिफोन सम्वोधन/'माओवादीका कारण मुलुक मुठभेडतर्फ'

जितेन्द्र खड्गा/राजबिराज , २०६६ पुस २३ -

एमाले अध्यक्ष झलनाथ खनालले माओवादीका कारण मुलुक मुठभेडतर्फ धकेलिदै गरेको आरोप लगाएका छन् ।
एमाले सप्तरीको सातौं जिल्ला अधिवेशनलाई टेलिफोनमा सम्वोधन गर्दै उनले माओवादीका कारण संविधान नबन्ने खतरा रहेको बताए । खनालले यसअघि एमाले बाँके अधिवेशनमा पनि टेलिफोनबाटै सम्वोधन गरेका थिए । 'माओवादीका कारण अहिले संविधान निर्माण प्रक्रिया ओझेलमा परेको छ, समयमा संविधान नबन्ने मुलुकमा ठूलो दुर्घटना हुनेछ,' उनले भने । खनालले सशस्त्र आन्दोलनमा लागेका सबैलाई शान्ति प्रक्रियामा आउन आग्रह समेत गरे । लोकतन्त्रलाई सुदृढ र संस्थागत गर्न एमाले दृढतापूर्वक अगाडी बढेको उनको भनाइ थियो । एमाले नेता धर्मनाथ साहले शान्ति सम्झौताप्रति सरकारलाई सचेत हुन आग्रह गरेका थिए ।