'उपेन्द्रप्रवृत्तिले मधेसी हक स्थापित हुँदैन'

काठमाडौं (नयाँ पत्रिका )

उपप्रधानमन्त्री एवं मधेसी जनअधिकार फोरम (लोकतान्त्रिक) का अध्यक्ष विजय गच्छदारले मधेसी अधिकारका लागि उठेको आवाजलाई उपेन्द्रप्रवृत्तिले समेट्न नसक्ने बताएका छन् । विभिन्न पार्टी परित्याग गरी फोरम प्रवेश गरेका नवआगन्तुकलाई स्वागत गर्न पार्टीको केन्द्रीय कार्यालयमा आयोजित कार्यक्रममा उपप्रधानमन्त्री गच्छदारले भने, 'फोरम लोकतान्त्रिक राष्ट्रिय पार्टी हो, त्यसैले फोरमलाई मधेस, पहाड, हिमाल सबै क्षेत्रको प्यारो पार्टी बनाउनुपर्छ ।' तोकिएकै समयभित्रै संविधान घोषणा हुने वातावरण तयार गर्न जिम्मेवार दलहरू इच्छुक नदेखिएकाले मुलुक ठूलै राजनीतिक संकटतर्फ धकेलिने सम्भावनासमेत रहेको गच्छदारले बताए । गच्छदारले नेपाल सद्भावना पार्टीका संस्थापक केन्द्रीय सदस्य एवं केन्द्रीय सल्लाहकार समिति सदस्य दिलिपकुमार धाडेवा, कांग्रेस गौर नगर समितिका पूर्वसभापति मनोज शर्मा, फोरम संस्थापन पक्षका बारा जिल्ला सभापति सइद हवारीलगायतका नेतालाई सदस्यता प्रदान गरी आफ्नो पार्टीमा स्वागत गरेका थिए ।