केएफसी र पिज्जा हट दशैँपछि काठमाडौँमा

विजयबाबु खत्री, काठमाडौं, साउन ३२- बहुराष्ट्रिय ब्रान्ड नेपाल आउने क्रम वृद्धि भैरहेको छ। नेपालले नेपाली बजारमा कम्पनीका आँखा नेपाली बजारतर्फ सोझिएका छन्।
विश्वप्रसिद्ध फाष्टफुड रेष्टुरेन्ट केन्टकी फ्राइड चिकेन (केएफसी) र पिज्जा हट दशैंपछि दरवारमार्गमा खुल्ने भएका छन्। भारतको देवयानी इन्टरनेशनलले यहाँ केएफसी र पिज्जाहटका शाखा खोल्न लागेको हो। यो कम्पनीले भारतमा ५० भन्दा बढी केएफसी र पिज्जाहटका शाखा संचालन गर्दै आएको छ।

पेप्सीको नेपालका प्रमुख कार्यकारी सुरन्जन डेले दशैं र तिहारबीच दुवै रेष्टुरेन्ट खुल्ने जानकारी दिए। नेपालमा पेप्सी उत्पादन गर्ने वरुण वेभरेज र देवयानी इन्टरनेशनसनलको मातृकम्पनी आरजे कर्प हो।

राजधानीमा पैसा खर्च चाहनेको संख्या उल्लेखनीय रुपमा बढै गएको तर बहुराष्ट्रिय रेष्टुरेन्टका शाखा नभएकाले यो खोल्न लागिएको उनले जानकारी दिए। निकै ठूलो लगानी हुने भएकाले पेप्सीको बजार बढाउन सहयोग पुग्ने गरी यो खोलिएको डेको दावी छ।

उनका अनुसार यी दुई रेष्टुरेन्टमा काम गर्नका लागि १ सयभन्दा बढी कर्मचारी छनौट गरिसकिएको छ। केही प्राविधिक विज्ञहरु भारतबाट आउने छन्। ३ हजार ५ सय वर्गफुट क्षेत्रफलमा खोल्न लागिएका यी दुवै रेष्टुरेन्ट अन्नपूर्ण होटलसँगै निर्माणाधिन भवनको भूँई तल्ला र पहिलो तल्लामा खोल्न लागिएको हो।

रेष्टुरेन्ट स्थापनाका लागि महँगा उपकरण काठमाडौं आइसकेका छन्। ठूलो आकारको कोल्डस्टोर र खाना तयार गर्ने कारखानासमेत स्थापना भैसकेको छ। यसमा प्रयोग हुने सामानमध्ये अधिकांश विदेशबाट नै आउँछन्।

यसैगरी नेपाली बियर बजारमा प्रतिस्पर्धा गर्न अमेरिकी तथा युरोपेली बजारमा रुचाइएका बियर आउने भएका छन्। अहिलेसम्म नेपाली बियर बजारमा खेतान समूहको एकाधिकार थियो।

अमेरिकाको सबभन्दा लोकप्रिय बियर बदवाइजर दुई महिनाभित्र नेपाली बजारमा बिक्री शुरु हुने भएको छ। पेप्सीको नेपालका प्रमुख कार्यकारी अधिकृत सुरन्जन डेले आर्टिक्ट इन्टरनेशनलले दुई महिनाभित्र वदवाइजर बियर आयात गरी बजारमा पुर्‍याउन लागेको जानकारी दिए। पेप्सीको नेपाल र अरसिक्ट भारतको इनवेभ इन्कर्पोरेशन अन्तर्गतका कम्पनी हुन्।

सन १८७६ देखि उत्पादन शुरु भएको यो बियर अमेरिकामा सबभन्दा बढी बिक्री हुन्छ। डेले नेपाली उपभोक्ता नयाँ नयाँ स्वादका वियर मन पराउन थालेपछि बजारमा ल्याउन लागिएको जानकारी दिए।

जर्मनमा निकै चल्तीमा रहेको वेक्स बियरसमेत नेपालमा आउन लागेको छ। यो बियर ५ बर्षभन्दा अघिदेखि उत्पादन हुदैं आएको छ। लवनब्रु वियरको बढो बजारले कम्पनी उत्साहित भएको छ। रेष्टुरेन्टहरुले सधैं नयाँ नयाँ प्रकारको वियर उपभोक्तालाई पस्कन चाहन्छन्।

Source:[http://www.nagariknews.com/news-highlights/139-highlights/4040-2009-08-16-03-40-34.html]