दीर्घकालीन महत्त्वका सन्धिसम्झौता गर्दिनँ: प्रधानमन्त्री

दीर्घकालीन महत्त्वका सन्धिसम्झौता गर्दिनँ: प्रधानमन्त्री


नयाँ पत्रिका

काठमाडौं, ३२ साउन

प्रधानमन्त्री माधवकुमार नेपालले दीर्घकालीन महत्त्व राख्ने कुनै पनि सन्धि-सम्झौतामा भारतसँग हस्ताक्षर नगर्ने प्रतिबद्धता व्यक्त गरेका छन् । सिंहदरबारस्थित कार्यालयमा आफैंले बोलाएको सर्वदलीय बैठकमा प्रधानमन्त्री नेपालले भारत भ्रमणको तयारी पूरा भएकोसमेत जानकारी दिए ।

भारत भ्रमणको दुई दिनअघि आयोजित सर्वदलीय बैठकमा प्रधानमन्त्री नेपालले भने, 'भ्रमणको सम्पूर्ण तयारी गरेको छु । पूर्वप्रधानमन्त्री, पूर्वपरराष्ट्रमन्त्री, भारतका लागि पूर्व नेपाली राजदूतहरूसँग यस विषयमा कुराकानी गरिसकेको छु ।'

तर, पञ्चेश्वर परियोजनाप्रति प्रधानमन्त्री सकारात्मक देखिएको बैठकमा सहभागी नेकपा एकीकृतका अध्यक्ष ऋषि कट्टेलले बताए । 'पञ्चेश्वरको तयारी पूरा भइसकेको भए हस्ताक्षर नै गरेर

आउँथेँ भन्ने आशय व्यक्त गर्नुभयो प्रधानमन्त्रीजीले,' कट्टेलले भने ।

परराष्ट्रमन्त्री सुजाता कोइराला, आपूर्तिमन्त्री राजेन्द्र महतो तथा परराष्ट्र सचिव ज्ञानचन्द्र आचार्यसमेत सहभागी सर्वदलीय बैठकमा प्रधानमन्त्री नेपालले राष्ट्रियतामा आँच पुग्ने खालको कुनै पनि विषयमा सम्झौत्ाा नगर्ने दृढता व्यक्त गरे ।

बैठकमा परराष्ट्रमन्त्री कोइरालाले आफ्नो भारत भ्रमण उपलब्धिमूलक रहेको 'बि्रफिङ' गरिन् । अघिल्लो सरकारका पालामा भारतसँगको सम्बन्ध चिसिएको महसुस भएको भन्दै कोइरालाले आफूले सम्बन्ध सुमधुर बनाएर फर्केको बताइन् । 'भारतका प्रधानमन्त्री मनमोहन सिंह हाम्रा प्रधानमन्त्रीलाई भेट्न उत्सुक हुनुहुन्छ, मैले पहिला चिसिएको सम्बन्ध सुमधुर गरेर फर्केकी छु,' कोइरालाले बैठकमा भनेकी थिइन् ।

बैठकमा परराष्ट्रसचिव ज्ञानचन्द्र आचार्यले थाँती रहेका तथा चलिरहेका परियोजना, सीमा समस्या, डुबानलगायतका एजेन्डा छलफलमा रहेको 'बि्रफिङ' गरेका थिए । यद्यपि वाणिज्य सन्धिबारे परराष्ट्र सचिवले स्पष्ट नबताएको बैठकमा सहभागी एक नेताले जानकारी दिए । प्रधानमन्त्री नेपालले पनि सुपुर्दगी सन्धिका बारेमा केही पनि बताएनन् ।

कट्टेलका अनुसार प्रधानमन्त्रीले सबै विषयमा छलफल हुने, तर दीर्घकालीन महत्त्वका कुनै पनि विषयमा सम्झौत्ाा र हस्त्ााक्षर नहुने बताएका थिए ।

बैठकमा सहभागी माओवादी विदेश विभागप्रमुख कृष्णबहादुर महराले 'गुडविल भिजिट' मा मात्रै भ्रमणलाई सीमित पार्न तथा कुनै पनि विषयमा सम्झौता नगरी फर्किन प्रधानमन्त्रीलाई आग्रह गरेका थिए ।

बैठकमा मधेसी जनअधिकार फोरम संस्थापन तथा नेपाल मजदुर किसान पार्टीका प्रतिनिधि सहभागी थिएनन् ।

पाँच दलको ज्ञापन

साना पाँच वाम दलले सुपुर्दगी सन्धिसम्बन्धी भारतीय प्रस्ताव स्वीकार नगर्न तथा पञ्चेश्वर र नौमुरे जलविद्युत् आयोजना खारेज गर्न प्रधानमन्त्रीसमक्ष ज्ञापन गरेका छन् ।

भारत भ्रमणको पूर्वसन्ध्यामा आइतबार प्रधानमन्त्री माधवकुमार नेपालसँग भेट गरी ती दलहरूले असमान सन्धिहरू खारेज गर्नुपर्ने, कालापानीबाट भारतीय फौज हटाउनुपर्ने एवं अतिक्रमित भूभाग फिर्ता गर्न पहल गर्नुपर्नेलगायत माग रहेको ज्ञापनपत्र बुझाएका थिए ।

ज्ञापन गर्नेमा राष्ट्रिय जनमोर्चा, नेकपा एकीकृत, जनमोर्चा नेपाल, नेकपा माक्र्सवादी तथा नेकपा माओवादी केन्द्रीय संयोजन समितिका नेताहरू थिए । एयरपोर्टमा भारतीय सुरक्षाजाँच व्यवस्थाको मागलाई दृढतापूर्वक अस्वीकार गर्नुपर्ने मागसमेत ज्ञापनमा उल्लेख छ ।

'





सुटुक्क हस्ताक्षर हुँदैन’

काठमाडौं/ प्रधानमन्त्री माधवकुमार नेपालले भारत भ्रमणका क्रममा सिमानाका विषयमा हस्ताक्षर नगर्ने बताएका छन् । सीमा सरोकार नागरिक समितिको प्रतिनिधिमण्डलसँग सिंहदरबारस्थित कार्यालयमा आइतबार छलफल गर्दै प्रधानमन्त्री नेपालले भ्रमणका क्रममा कुनै पनि हस्ताक्षर नहुनेसमेत स्पष्ट गरे ।

'अहिले हस्ताक्षर गर्ने कार्यक्रम छैन, तपाईंहरू ढुक्क हुनुस्,' प्रधानमन्त्रीले आश्वस्त पार्दै भने, 'हस्ताक्षर गर्ने वेलामा धुमधामका साथ गरिन्छ, सुटुक्क हुँदैन ।'

भारत भ्रमणका सन्दर्भमा प्रधानमन्त्री नेपाललाई भेट्न समितिका अध्यक्ष चेतेन्द्रजंग हिमाली, सचिव फणीन्द्र नेपाल र सदस्यहरू डा. सुरेन्द्र केसी र बुद्धिनारायण श्रेष्ठ आइतबार अपराह्न सिंहदरबार पुगेका थिए ।

Source:[http://www.nayapatrika.com/newsportal/desh/4903.html]