नेपालमा लगानी प्रबर्धन गर्न प्रम नेपालको आग्रह

नेपालमा लगानी प्रबर्धन गर्न प्रम नेपालको आग्रह


प्रधानमन्त्री माधवकुमार नेपालले शान्ति प्रक्रियाको प्रगतिसंगै राजनीति तथा समग्र वातावरणमा क्रमिक सुधार आइरहेको भन्दै हामी भारतीय उद्योगी तथा व्यावसायीहरुलाई नेपालमा लगानी प्रवाह गर्न आग्रह गरेका छन ।

भारतीय उद्योग वाणिज्य महासंघ (फिक्की) भारतीय उद्योग परिसंघ (सीआइआइ) र एसोसियट चेम्बर अफ कमर्श अफ इन्डिया (एसोच्याम)द्वारा उनको सम्मानमा नयाँ दिल्लीमा आयोजना गरेको छलफल कार्यक्रममा उनले यतिखेर नेपालले पुननिर्माण र पुर्नसंरचनामा ध्यान केन्द्रित गरिरहेको हुनाले त्यहां लगानीका व्यापक संभावनाहरु रहेका भन्दै लगानी प्रवर्धन गर्न आग्रह गरेका हुन ।

उनले जलस्रोत, सडक, पुल, पूर्वाधार विकास, निर्माण सामाग्री, पर्यटन उद्योग, कृषि प्रशोधन, शिक्षा स्वास्थ्य र वित्तीय सेवाहरुमा लगानीको संभावना रहेको बताए ।
'हामी वैदेशिक लगानीको स्तरमा बृद्धि चाहिरहेका छौ' भन्दै उनले ठूला आयोजनाहरुलाई स्वीकृति दिन शीघ्र यथासम्भव अधिक सुविधा उपलब्ध गराउन तथा शीघ्र रुपमा आयोजनाहरुलाई कार्यान्वय गर्न आवश्यक सहयोग गर्नका लागि उच्चस्तरको लगानी बोर्डको स्थापना गर्न आफू प्रतिबद्ध भएको बताए ।

भारतीय लगानीकर्ताहरुलाई स्वदेशमा नै रहेर सहरको अनुभूति दिलाउन अप्ठ्याराहरुलाई हटाउन र सरकारबाट उच्चस्तरको आदर प्रकट गर्ने कुराको प्रत्याभूतिका लागि प्रधानमन्त्री कार्यालयले अनुगमन र समन्वय गर्ने आश्वासन दिदै उनले सबै विषयगत मन्त्रालयहरुबाट वैदेशिक लगानीलाई यथोचित प्राथमिकता दिन र यसको सहज संचालनका लागि व्यक्तिगत रुपमा आफूले सुनिश्चितता गर्ने प्रतिवद्धता जनाए ।

त्यसैगरी नेपालमा बैदेशिक लगानीलाई आवश्यक प्रवद्र्धन गर्नका लागि उच्चस्तरको राजनीतिक समितिसमेत रहने उनको भनाई थियो ।

कार्यक्रममा नेपाली उद्यमी व्यावसायीहरुका तर्फबाट नेपाल उद्योग वाणिज्य महासंघका अध्यक्ष कुशकुमार जोशीले नेपालमा तुलनात्मक लाभका क्षेत्र बढी भएको भन्दै लगानी प्रवर्धन गर्न आग्रह गरे ।
उनले नेपाल भारतबीचको वाणिज्य संन्धीले नेपाली उत्पादनलाई भारतीय बजारमा पहुँच विस्तार गरेको भन्दै यसलाई समयानुकूल परिमार्जनका लागि द्विपक्षीय व्यावसायिक सहकार्य जरुरी रहेको बताए ।

भारतीय राष्ट्रपतिसंग भेट

पाँच दिने औपचारिक भारत भ्रमणमा रहेका प्रधानमन्त्री नेपालले बुधबार मध्यान्ह भारतीय राष्ट्रपति प्रतीभा पाटिलसँग भेट गरेका छन। भेटका क्रममा द्विपक्षीय हित लगायतका विषयमा कुराकानी भएको प्रधानमन्त्रीका प्रेस सल्लाहकार विष्णु रिजालले जानकारी दिए ।

राष्ट्रपति पाटिललाई भेट्न प्रधानमन्त्री नेपाल राष्ट्रपति भवन पुगेका थिए । भेटमा अवसरमा उर्जामन्त्री प्रकाशशरण महत, प्रधानमन्त्रीका राजनीतिक सल्लाहकार रघु पन्त, राजन भट्टराई नेपालका लागि भारतीय राजदूत राकेश सूद लगायतको उपस्थिति थियो।

यसअघि प्रम नेपालले बुधबारै त्यहाँका विदेश मन्त्री एसएम कृष्णासंग भेटेका थिए । भेटपछि पत्रकारहरुसंग स‌ंक्षिप्त कुरा गर्दै भारतीय विदेश मन्त्री कृष्णाले भारतको नेपालसंग विशेष सम्बन्ध रहेको भन्दै यसलाई अझ बलियो पार्ने दिशामा छलफल भएको बताए ।
उनले शान्तिप्रक्रियालाई निष्कर्षमा पुर्‍याउन सबै पक्षलाई समेटेर लैजान प्रधानमन्त्री नेपाल तयार रहेएको आफूले पाएको उल्लेख गरे ।
प्रधानमन्त्री नेपालले आजै आफ्ना समकक्षी डा‍ मनमोहन सिंहसंग पनि भेट गर्ने र सिंहद्वारा आयोजित रात्रि भोजमा सहभागी गर्नेछन ।
यस्तै आजै उनले त्यहाँका उपराष्ट्रपति हमिद अन्सारी, कांग्रेस आइकी अध्यक्ष सोनिया गान्धीसँग पनि भेट गर्ने भएका छन।
उनले बिहान दिल्लीको राजघाट पुगी महात्मा गान्धीको समाधिस्थलमा पुष्पगुच्छा अर्पण गरे । समाधिस्थलका कर्मचारीले प्रधानमन्त्री नेपाललाई महात्मा गान्धीको अर्धकदको मूर्ति उपहार प्रदान गरेका थिए ।
प्रम नेपालसँग उनकी पत्नी गायत्री नेपालसहित मन्त्रीहरू, सभासद्हरू, भ्रमणदलका अन्य सदस्यहरूले पनि स्व. गान्धीप्रति सम्मान व्यक्त गरेका थिए ।
उनले मंगलबार उनले प्रमुख विपक्षी भारतीय जनता पार्टीका राज्यसभामा विपक्षी दलका नेता अरुण जेट्ली र भारतीय कम्युनिस्ट पार्टीका महासचिव एबी बर्द्र्धन, भारतीय कम्युनिस्ट पार्टी माक्स्रवादीका वरिष्ठ नेता सीताराम यचुरीसँग भेट गरेका थिए भने नेपाल लोकतन्त्र ऐक्यबद्धता समूहका नेताहरुसँग पनि भेटेका थिए ।
उनले बारखम्बास्थित नेपाली दूतावासमा नेपाली समुदायलाई पनि सम्बोधन गरेका थिए ।

Source:[http://www.dainikee.com/newsdetail-9667.html]