खोटाङ, ५ भदौ
जिल्लामा सहकारी कार्य सन्जालमार्फत सुपथ मूल्यको सहकारी पसल सञ्चालन गरिने भएको छ । व्यवस्थित सहकारी पसल सञ्चालनका लागि विभिन्न १० सहकारी संस्थाले सन्जाल निर्माण गरी सोको जानकारी दिएका हुन् ।
सामान ढुवानी, व्यवस्थित पसल सञ्चालन र मूल्य निर्धारण लागि सहज बनाउने उद्देश्यले सन्जाल निर्माण गरिएको सन्जाल अध्यक्ष तथा नवज्योति बचत तथा ऋण सहकारी संस्था कुभिन्डेका अध्यक्ष शिवराज राईले जानकारी दिएका हुन् ।
सहकारी पसलबाट पाइने फाइदा/बेफाइदबारे सामूहिक रुपमा बहसका लागि पनि सन्जाल गठन गरिएको सन्जालमा सहभागी मिलिजुली सहकारी संस्था बाम्राङका रामकुमार हिङमाङले बताए । सन्जालले सामान ढुवानी गरी ठाउँ-ठाउँमा डिलर राख्ने र त्यसैमार्फत सन्जालसम्बद्ध सहकारीसम्म सामान पुर्याउने बताइएको छ ।
सामान ढुवानी प्रक्रिया बुझ्न र ढुवानी गर्न चारजना सदस्य सम्मिलित समिति बनाइएको छ । समितिमा इमो उपभोक्ता सहकारी संस्था दुर्छिमका अध्यक्ष चक्र राई संयोजक तथा नवज्योति कुभिन्डे, मिलिजुली बाम्राङ र सामुदायिक सरोकार बचत तथा ऋण सहकारी अर्खौले सदस्य छन् ।
सन्जालमा आबद्ध सहकारीले पहिलो चरणमा आयोडिनयुक्त नुन, ढिकेनुन, लुगाधुने साबुन, चिया, चिनी, चामल, खानेतेल, मसला, चिउरालगायत दैनिक उपभोग्य वस्तु बिक्री गर्ने हिङमाङले जानकारी दिए ।
सन्जालमा अर्खौले, कुभिन्डे, नुनथला, पाथेका, दुर्छिम, बाम्राङ, हौचुर, सल्ले, लामिडाँडा र खार्पाका सहकारी संस्था सहभागी छन् । अन्य सहकारीलाई समेत कार्यक्रममा आबद्ध गराइने सन्जालले जनाएको छ । खोटाङमा ५१ सहकारीले सुपथ मूल्यको सहकारी पसल सञ्चालन गर्ने जिल्ला कृषि विकास कार्यालयले जनाएको छ ।
Source:[http://www.nayapatrika.com/newsportal/finance/5090.html]
No comments:
Post a Comment