कुनै पनि सन्धी सम्झौता नगर्न माओवादीको चेतावनी

काठमाडौं, ४ भदौ (दैनिकी)
प्रमुख प्रतिपक्षी दल एकीकृत नेकपा माओवादीको संयुक्त राष्ट्रिय जनआन्दोलन नेपालले प्रधानमन्त्री माधवकुमार नेपालको भारत भ्रमण क्रममा पञ्चेश्वरलगायतका कुनै पनि नयाँ सम्झौताहरु नगर्न चेतावनी दिएको छ।
राजधानीमा सम्पन्न संयुक्त राष्ट्रिय जनआन्दोलन नेपालको भेलापछि जारी विज्ञप्तिमा शान्ति सम्झौतामा कुनै पनि नयाँ सन्धीसम्झौता गर्दा राजनैतिक दलहरुको सहमति हुनुपर्ने उल्लेख गर्दै भ्रमणमा जनभावना विपरित कुनै सम्झौता भएमा त्यस्ता संझौताहरु अमान्य हुने उल्लेख छ।
भेलाले कुनै पनि हातहतियार र विस्फोटक पदार्थ खरिद गर्न नपाइने शान्ति सम्झौताको प्रावधान विपरीत नेपाल सरकार र भारत सरकारबीच हातहतियार खरिद बिक्रि हुन खोजिरहेको भन्दै आपत्ती जनाइएको छ।
सो भेलाले भोक, रोग र प्राकृतिक प्रकोपले क्षति पुगेका परिवारप्रति समवेदना प्रकट गर्दै चर्को मंहगी तुरुन्त घटाउन र जनतालाई राहत उपलब्ध गराउन सरकारसँग माग गरेको विज्ञप्तिमा उल्लेख छ।
यस्तै, जनयुद्ध र जनआन्दोलनका शहिद परिवारलाई सुलभ तरिकाले राहत उपलब्ध गराउन तथा बेपत्ता बनाइएकाहरुको खोजीका लागि उच्चस्तरीय आयोग गठन गर्न पनि माग गरिएको छ।
माओवादीले आफ्नै नेतृत्वको राष्ट्रिय सरकार गठनमा दवाव दिन क्रान्तिकारी संयुक्त मोर्चा गठन गरेको छ । मोर्चाले बिहीबार सम्पन्न बैठकले जारी आन्दोलनलाई निष्कर्षमा पुर्या्उन ४५ बुँदे घोषणा(पत्र पनि सार्वजनिक गरेको छ ।
नागरिक सर्वोच्चताका लागि जारी आन्दोलन अघि बढाउन बुधबार पुनःगठन भएको संयुक्त राष्ट्रिय जनआन्दोलन समितिले सत्ताको साधनको रुपमा पनि काम गर्दै जाने रणनीतिसहित घोषणापत्र सार्वजनिक गरेको छ । घोषणापत्र बुधबार राजधानीमा भएको भेलाले पारित गरेको थियो ।


Source:[http://www.dainikee.com/newsdetail-9703.html]