मधेस एक प्रदेश नभए नयाँ संविधान नमान्ने चेतावनी

नेपालगन्ज (नयाँ पत्रिका)

मधेसी जनअधिकार फोरम नेपालले समग्र मधेस एक प्रदेश माग सम्बोधन नभए नयाँ संविधान नमान्ने चेतावनी दिएको छ । फोरम अध्यक्ष उपेन्द्र यादवले आफ्नो माग पूरा नभए मुलुक विखण्डनमा जान चेतावनी दिँदै त्यस्तो संविधान बहिष्कार गर्ने चेतावनी दिएका हुन् । एकीकृत माओवादीले आफूखुसी स्वायत्त राज्य घोषणा गर्नु असंवैधानिक भएको टिप्पणीसमेत नेता यादवको थियो । आइतबार फोरम बाँकेले आयोजना गरेको पत्रकार सम्मेलनमा नेता यादवले मधेसमा ९८ र मुलुकभरि एक सय २५ जातिको बसोवास रहेको भन्दै जातजातिका नाममा गणराज्य घोषणा गर्नु मुख्र्याइँ रहेको दाबी गरे । नेता यादवले माओवादीले गणराज्य घोषणा गरेर मुठभेड गराउन खोजेको आरोप पनि लगाए । माओवादीले बाँके, बर्दिया, दाङ, कञ्चनपुर र कैलालीलाई थारुवन गणराज्य घोषणा गरेपछि फोरमका केन्द्रीय नेता यस क्षेत्रमा दैनिकजसो कार्यक्रम गरी त्यसको विरोध गरिरहेका छन् । 'गणराज्यबारे राजनीतिक सहमतिबाट समस्याको छिनोफानो गर्न सकिन्छ,' अध्यक्ष यादवले भने, 'तर माओवादी आफूखुसी गणराज्य घोषणा गर्दै हिँडिरहेको छ ।'

उनले राजनीतिक सहमतिका लागि तीन दलले मात्र सहमति गरेर नपुग्ने, त्यसमा मधेसवादीलगायत अन्य दललाई पनि सहमत गराउनुपर्ने बताए । उनले मधेसलाई अधिकार दिने कार्यमा षड्यन्त्र भए तेस्रो ठूलो मधेस आन्दोलन गर्ने चेतावनीसमेत दिए । गणराज्य घोषणाको विरोधमा फोरमले बाँकेको नेपालगन्ज, राप्तीपारि, बर्दियाको गुलरियामा विरोध कार्यक्रम गरी गणराज्य फिर्ता नभए मुठभेड हुने चेतावनी पनि दिए ।