अखाद्य कालो नुन आयात; भारतमै फिर्ता पठाइने

महेश चौरसिया/बाँके,

साल्ट ट्रेडिङ कर्पोरेसनको नेपालगन्जस्थित कार्यालयले करिब चार हजार बोरा २ सय ५० टन कालो नुन आयातित कम्पनीलाई फिर्ता पठाउने भएको छ ।  भारतको गुजरातस्थित बिडी साल्ट कम्पनीबाट मगाइएको नुन साउनमा नेपालगन्ज आइपुगेको थियो । 'कालो टुक्रा मिसिएको नुन खान नमिल्ने भएकाले कम्पनीलाई फिर्ता पठाउने तयारी भइरहेको छ,' साल्ट ट्रेडिङका निमित्त प्रमुख मनोज चौधरीले भने, 'त्यसका लागि कम्पनीसँग केन्द्रबाटै कुराकानी जारी छ ।' 

साल्टट्रेडिङले ग्याँस बिक्री गर्ने

साल्टट्रेडिङ कर्पोरेसनले तिहारपछि एलपी ग्याँस बिक्री गर्नेभएको छ । यसका लागि धादिङमा कारखाना स्थापनाको काम अन्तिम चरणमा पुगेको कर्पोरेसनकी महाप्रबन्धक उर्मिला श्रेष्ठले बताइन् । 'तिहारलगत्तै उपत्यका र धादिङका लागि सेवा सुरु गर्नेछौं,' उनले भनिन्, 'पोखराका लागि पछि निर्णय गरिनेछ ।' दसैं तिहारको समय उपभोक्ताका लागि सहज बनाउन यी पर्वमै बिक्री गर्ने लक्ष्य रहे पनि विभिन्न कारणले ढिलाइ भएको श्रेष्ठले बताइन् ।